अपांग तथा असहाय केन्द्रको आयोजनामा तथा विराटनगर आँखा अस्पतालको प्राविधिक सहयोगमा सम्पन्न एकदिने निःशुल्क आँखा शिविर

धरान । स्वास्थ्य सेवा सबैको पहुँचमा हुँदैन । अझ शारीरिक रूपमा अशक्त, आर्थिक रूपमा विपन्न र अस्पतालसम्म पुग्न नसक्ने नागरिकका लागि सामान्य आँखा परीक्षणसमेत चुनौती बन्न सक्छ । यस्तै अवस्थालाई मध्यनजर गर्दै धरान उपमहानगरपालिका–१९ स्थित अपांग तथा असहाय केन्द्रले मानव सेवाको उदाहरण प्रस्तुत गरेको छ ।

केन्द्रको आयोजनामा तथा विराटनगर आँखा अस्पतालको प्राविधिक सहयोगमा सम्पन्न एकदिने निःशुल्क आँखा शिविरबाट १०७ जना अपांगता भएका तथा असहाय नागरिक प्रत्यक्ष लाभान्वित भएका छन् । शिविरले केवल आँखा परीक्षणमै सीमित नरही, उपचारको आर्थिक भारसमेत आयोजकले आफैं व्यहोर्ने घोषणा गरेपछि कार्यक्रम थप अर्थपूर्ण बनेको छ ।
शिविरमा आधुनिक उपकरणमार्फत वरिष्ठ नेत्ररोग विशेषज्ञसहितको चिकित्सक टोलीले आँखा परीक्षण गरेको थियो । परीक्षणका क्रममा १७ जनामा मोतियाबिन्दुसहित गम्भीर समस्या देखिएपछि उनीहरूको शल्यक्रिया आवश्यक रहेको चिकित्सकहरूले सिफारिस गरेका छन् । ती सबै बिरामीको शल्यक्रिया, औषधि, चश्मा तथा आवश्यक उपचारको सम्पूर्ण खर्च अपांग तथा असहाय केन्द्रले व्यहोर्ने जनाएको छ ।
त्यसैगरी शिविरमा ७ जनालाई निःशुल्क औषधि, ३ जनालाई दृष्टि सुधारका लागि चश्मा उपलब्ध गराइएको थियो । कार्यक्रमकै अवसरमा एक जना विपन्न विद्यार्थीलाई शैक्षिक सामग्रीसमेत हस्तान्तरण गरिएको थियो । यसले स्वास्थ्य सेवा र सामाजिक उत्तरदायित्वलाई एउटै मञ्चमा जोड्ने प्रयास गरेको देखिन्छ ।
केन्द्रकी अध्यक्ष डम्बरकुमारी मास्केले आर्थिक अभावका कारण उपचारबाट वञ्चित हुनुपर्ने अवस्था अन्त्य गर्न केन्द्रले निरन्तर काम गर्दै आएको बताउनुभयो । अस्पतालसम्म पुग्न नसक्ने नागरिकका लागि विशेषज्ञ चिकित्सकलाई समुदायमै ल्याएर सेवा दिन पाउनु केन्द्रका लागि ठूलो सन्तुष्टिको विषय भएको उहाँको भनाइ थियो ।

केन्द्रका निर्देशक सुनिल खड्काले शल्यक्रिया गर्नुपर्ने बिरामीलाई विराटनगर आँखा अस्पतालसम्म लैजाने, उपचारको सम्पूर्ण व्यवस्थापन गर्ने र आवश्यक सबै समन्वय केन्द्रले गर्ने जानकारी दिनुभयो । उहाँले उपचारमा लाग्ने सम्पूर्ण खर्च केन्द्रले नै व्यहोर्ने जानकारी दिनुभयो ।

यस्ता शिविरले विशेषगरी अपांगता भएका, ज्येष्ठ नागरिक तथा आर्थिक रूपमा कमजोर समुदायलाई ठूलो राहत पुगेको छ । नियमित स्वास्थ्य सेवाको पहुँचभन्दा टाढा रहेका नागरिकका लागि यस्तो अभियान केवल उपचार मात्र होइन, आत्मविश्वास र आशाको नयाँ किरण पनि बनेको छ । यसमा उपचारमा संलग्न चिकित्सकहरुले समेत भरपुर सहयोग गर्ने प्रतिबद्धता जनाएका छन् ।

धरान–१९ को अपांग तथा असहाय केन्द्रले विगतदेखि नै सामाजिक सेवाका विभिन्न कार्यक्रम सञ्चालन गर्दै आएको छ । निःशुल्क स्वास्थ्य शिविर, राहत वितरण, शिक्षा सहयोग र समुदायमा आधारित सेवामूलक अभियानमार्फत केन्द्रले मानवीय सेवाको निरन्तरता कायम राख्दै आएको छ । समाजका सबैभन्दा कमजोर वर्गसम्म उपचारको पहुँच विस्तार गर्ने यस्ता अभियानले मानवता, सामाजिक उत्तरदायित्व र सहकार्यको उत्कृष्ट उदाहरण प्रस्तुत गरेका छन् ।