धरान उपमहानगरपालिका–४ खैरेनीटार र वडा नं. १५ खत्रीधाराको सीमा क्षेत्रमा रहेको सेउती खोलामा सूर्यनारायण भगवानको भव्य मन्दिर निर्माण गरी मूर्ति प्राणप्रतिष्ठा

धरान । धरान उपमहानगरपालिका–४ खैरेनीटार र वडा नं. १५ खत्रीधाराको सीमा क्षेत्रमा रहेको सेउती खोलामा सूर्यनारायण भगवानको भव्य मन्दिर निर्माण गरी मूर्ति प्राणप्रतिष्ठा गरिएको छ । मधेशी सेवा समाज, शिव शिक्षा परिवार तथा विभिन्न सामाजिक संघसंस्थाको अग्रसरतामा निर्माण सम्पन्न भएको मन्दिरले अब सेउती खोलामा वर्षेनी हुने छठ पर्वलाई थप व्यवस्थित, सुरक्षित र मर्यादित बनाउनुका साथै धार्मिक पर्यटन प्रवद्र्धनमा समेत महत्त्वपूर्ण योगदान पुग्ने अपेक्षा गरिएको छ ।

पूर्वी नेपालकै प्रमुख छठ घाटमध्ये एक मानिने सेउती खोलामा हरेक वर्ष तराई–मधेश तथा पहाडी समुदायका हजारौं श्रद्धालु अस्ताउँदो र उदाउँदो सूर्यलाई अघ्र्य अर्पण गर्न भेला हुने गरेका छन् । तर स्थायी पूर्वाधारको अभाव, जथाभावी घाट निर्माण, सरसफाइको समस्या तथा भीड व्यवस्थापनका चुनौतीका कारण प्रत्येक वर्ष श्रद्धालुले विभिन्न कठिनाइ भोग्दै आएका थिए । छठ पर्वपछि खोलाको किनारमा फोहोरमैला थुप्रिने, वातावरण प्रदूषित हुने र सुरक्षाको दृष्टिले समेत चुनौती सिर्जना हुने गरेको थियो ।
यही समस्याको दीर्घकालीन समाधान खोज्ने उद्देश्यका साथ मधेशी सेवा समाज, शिव शिक्षा परिवार तथा स्थानीय संघसंस्थाहरूको सहकार्यमा सेउती खोला किनारमा सूर्यनारायण भगवानको मन्दिर निर्माण गरिएको हो । हालै वैदिक विधिअनुसार विशेष धार्मिक अनुष्ठानका बीच मन्दिरमा भगवान सूर्यनारायणको मूर्ति प्राणप्रतिष्ठा गरिएको छ ।
शिव शिक्षा परिवारकी अध्यक्ष रेखा साहले मन्दिर निर्माणसँगै सेउती खोलामा छठ पर्व सभ्य, सुरक्षित र व्यवस्थित रूपमा सञ्चालन हुने विश्वास व्यक्त गर्नुभयो । विगतमा पूर्वाधारको अभावका कारण श्रद्धालुले सास्ती खेप्नुपरेको स्मरण गर्दै उहाँले अब स्थायी धार्मिक संरचना निर्माण भएपछि पूजाआजा धार्मिक मर्यादा र व्यवस्थापनका साथ सम्पन्न हुने बताउनुभयो । मन्दिरको प्राण प्रतिष्ठान भइसकेका कारा अब सहज हुने बताउनुभयो ।

मधेशी सेवा समाजका अध्यक्ष महेन्द्र कायस्थले जथाभावी खोला किनारमा छठ पर्व मनाउँदा वातावरणीय प्रदूषण र सुरक्षा जोखिम बढ्दै गएको अवस्थामा स्थायी समाधानका रूपमा मन्दिर निर्माण गरिएको बताउनुभयो । उहाँले अब सेउती खोलालाई व्यवस्थित छठ घाटका रूपमा मात्र नभई धरानको प्रमुख धार्मिक तथा पर्यटकीय गन्तव्यका रूपमा विकास गर्ने लक्ष्य रहेको उल्लेख गर्नुभयो । उहाँले संकलित रकमले मन्दिर निर्माणसँगै भविष्यमा ठूलो धर्मशाला निर्माण गर्ने योजना समेत अगाडि सारिएको बताउनुभयो ।

स्थानीयका अनुसार सूर्यनारायण भगवानको मन्दिर निर्माणले छठ पर्वलाई थप व्यवस्थित बनाउनुका साथै सेउती खोलाको धार्मिक, सांस्कृतिक र पर्यटकीय महत््वलाई नयाँ उचाइमा पु¥याउने विश्वास गरिएको छ । धार्मिक आस्था, वातावरण संरक्षण र सामाजिक सद्भावलाई एकसाथ जोड्ने यस अभियानले धरानमा धार्मिक पर्यटन विकासका लागि नयाँ सम्भावना सिर्जना गरेको आयोजकहरूको अपेक्षा छ ।