लामो समयदेखि विशिष्ट योगदान पु¥याउँदै आएका वरिष्ठ कलाकार मदनकृष्ण श्रेष्ठ र धरान शहर बसाउने परिवारका सदस्य तथा बरिष्ठ समाज सेवी सरला कायस्थलाई लाई भव्य नागरिक अभिनन्दन

धरान । पासा खल धरानको आयोजनामा कुटुम्ब ब्याण्डको प्रस्तुति संगै दुइ जनालाई सम्मान गरिएको छ । हिज धरानको भानुचौकमा आयोजित कार्यक्रममा नेपाली रंगमञ्च, हास्यव्यङ्ग्य, चलचित्र तथा सामाजिक चेतनाका क्षेत्रमा पाँच दशकभन्दा लामो समयदेखि विशिष्ट योगदान पु¥याउँदै आएका वरिष्ठ कलाकार मदनकृष्ण श्रेष्ठ र धरान शहर बसाउने परिवारका सदस्य तथा बरिष्ठ समाज सेवी सरला कायस्थलाई लाई भव्य नागरिक अभिनन्दन गरिएको हो । पासा खलः धरानको आयोजनामा सम्पन्न विशेष सांस्कृतिक कार्यक्रममा मौलिक नेवारी बाजागाजा र परम्परागत धुनलाई विश्वमञ्चसम्म पु¥याउँदै आएको कुटुम्ब ब्यान्डको ऐतिहासिक प्रस्तुति रहेको थियो ।

नेवारी भाषा, कला, संस्कृति र मौलिक बाजागाजाको संरक्षण तथा प्रवद्र्धन गर्ने उद्देश्यले आयोजित कार्यक्रममा कुटुम्ब ब्यान्डले परम्परागत वाद्यवादनमार्फत दर्शकलाई मन्त्रमुग्ध बनाएको थियो । त्यसपछि मञ्चमा उक्लिनुभएका ७४ वर्षीय श्रेष्ठले आफ्ना चर्चित गीतहरू प्रस्तुत गर्दा हजारौँ दर्शक लामो समयसम्म ताली र सम्मानका साथ सहभागी बने ।
सम्मान ग्रहणपछि सम्बोधन गर्दै श्रेष्ठले नेपाली कला क्षेत्रमा स्थापित ‘मह जोडी’ कुनै दुई व्यक्तिको नाम मात्र नभई जीवनभरको साधना, विश्वास र जनताले दिएको मायाबाट बनेको साझा संस्थागत पहिचान भएको बताए । उनले मह जोडी जिन्दगीभरिको कमाइ भएको बताउँदै यो केवल मदनकृष्ण र हरिवंशको नाम नभई जनताको विश्वासबाट निर्माण गरेको एउटा साझा ब्राण्ड भएको बताउनुभयो ।

आफ्नो कलाकारिता यात्राको स्मरण गर्दै उनले आफूहरूले कुनै असाधारण काम नगरेको, समय र जनताले मागे अनुसारको भूमिका मात्र निर्वाह गरेको उल्लेख गर्दे पञ्चायतकालमा पनि जनताको पीडा, अन्याय, भ्रष्टाचार र विकृतिलाई व्यङ्ग्य नाटक मार्फत प्रस्तुत गरेको स्पष्ट पारे ।
कार्यक्रमका प्रमुख अतिथि कोशी प्रदेश सभाका सभामुख अम्बरबहादुर विष्टले नेपालको विविध भाषा, धर्म, कला र संस्कृतिको संरक्षणबाट मात्रै राष्ट्रिय एकता अझ सुदृढ हुने बताए । उनले धरानका युवा तथा पासा खलःले नेवारी बाजागाजा र सांस्कृतिक सम्पदाको संरक्षणमा खेलेको भूमिकाको प्रशंसा गर्दै यस्ता अभियानलाई प्रदेश सरकारको निरन्तर सहयोग रहने प्रतिबद्धता व्यक्त गर्नुभयो ।

कार्यक्रममा धरान उपमहानगरपालिकाका जनप्रतिनिधि, विभिन्न सामाजिक तथा सांस्कृतिक संघसंस्थाका प्रतिनिधि, साहित्यकार, कलाकार र हजारौँ स्थानीयको उल्लेखनीय उपस्थिति रहेको थियो ।
पासा खलः धरानले स्थापना कालदेखि नै नेवारी भाषा, लिपि, बाजागाजा तथा सांस्कृतिक सम्पदाको संरक्षणमा निरन्तर सक्रिय भूमिका निर्वाह गर्दै आएको छ । यसपटकको कार्यक्रमले वरिष्ठ कलाकार मदनकृष्ण श्रेष्ठप्रतिको सम्मान मात्र होइन, नेपाली मौलिक कला र सांस्कृतिक पहिचान संरक्षणप्रतिको सामूहिक प्रतिबद्धतालाई समेत थप बलियो बनाएको सहभागीहरूले बताएका छन् ।